IUDE

Iude yana kiluma.

Iemesa taina 'ana wagava Iude leta de'e i kilumi. We'e Iemesanina, tovetumaganavo i miamianiga Ielusalema, taunina 'adi to'edakumeta bwaikina. To'aseta fuedi yadi nuanua, Iudenina kumanina Iesu taina. (Malika 6:3)

Tovetumagananidi 'waidie i kilumaga, de'e leta nageneye Iude kebu i da lu'ivoneyeniga. I kilumaga igodi nuanuana i da veifufu 'ada 'ita'ita'i Yaubada 'wainega faifaina nika vala i nogai tove-vekavekali yadi ve 'waidiega tovetumaganavo i vevekaliedi, bega leta de'e 'wainega i matakia 'waidie. Wata i velu'ase'asedi ve mogitana Iesu faifaina 'adi 'ibababala. De'e letanina 'ana 'idi side bani'odi.

Vona-vekaiwa. 1:1-2

Tove-vekavekali yadi sauluva, yadi ve, wata yadi wafaotoga faifaidi. 1:3-16

I na tokemaigedi yadi vetumagana 'waidie. 1:17-23

Yaubada wata Iesu Keliso 'adi subia. 1:24-25

Jude

1 Yau Iude, Iesu Keliso yana tofolova wata Iemesa taina, a vekaiwa 'omi tomotoganimi Iesu Keliso tutuya fuedi i 'ibababalemiga 'waimie. Yaubada Tamada i venua'ivinemi wata i nunuakalikaliemi. 2 A vevelu'ui faifaimi nuanuaku Yaubada i na 'i'isanuakalikaliemi, nuanua bikana mia 'atumaina taiadi i na velevelemi, wata tutuya fuedi i na nunuakalikaliemi.

Tove-vekavekali faifaidi.

3 Ekwavo, nuanuaku a da kilukiluma 'waimie fueda 'ada 'ita'ita'i Yaubada 'wainega faifaina, siwe 'asiau a vebaeku mogitana a na kiluma 'waimie tamu nani faifaina. Nuanuaku Yaubada yana Vona Tonovidi 'wa na 'ibababaledi tove-vekavekali 'waidiega, Vonanidi basenadi i 'anivelena-tamogeni tutuya matatabuna faifaidi yana tomotoga 'waideye. 4 Nuanuaku 'wa na 'ibababalediga fai Yaubada 'ana tovedumwe'ai'ai 'ifwaidi i yogosebaseba i vevekali 'waimie i vo, 'Wa vetumaganaga Iesu 'waineye begaidi Yaubada kebu vematavuloga i na velemiga i na nuakalikaliemimo, 'ami fata 'wa na sakosakona.” Tovekalinidi faifaidi basenadiotoga i kilumi Yaubada yana Buki 'waineye, 'akonadi Yaubada i veimea 'adi vematavuloga i na veluagai fai 'Auvea Iesu Keliso, 'aiseotogina 'ada Toveimea i vedumwe'ai'aieni.

5 Vona mogitana tovedumwe'ai'ainidi vematavuloga i na veluagai Yaubada 'wainega bani'odi basenadi tosakona i veluagai. Nani de'e 'akonadi 'wa 'asetai siwe nuanuaku a na tolinuata'iemi nika 'wa na nuani. Basenadiotoga me Isileli matatabudi 'Auvea i 'ita'ita'iedi Itifita 'wainega i vagavaidi siwe mulieta 'ifwaidi i luvewafadi fai kebu nuanuadi i na vematayakayaka 'waineye. 6 Wata 'wa na nuani basenadiotoga anelose ma yadi veimea siwe 'ifwaidi i baila nuanuadi sakona bega yadi 'eba mia i 'iaweni. Tobailanidi Yaubada i yogona-vagasedi i yatodi Vatu'ai Manamanawena 'waineye, dudubala nageneye, mulieta Vonayavuga 'ana 'Aiata 'waineye, i na veimea 'adi vematavuloga faifaina.

7 Wata bani'odi 'atamana 'ailuga Sodoma wata Gomola 'ifwaidi 'atamana lilivadie taiadi. Basenadiotoga 'atamananidi 'adi tomotoga i veve'avula-'avo'avovo anelosenidi sakoidi bani'odi, wata iaveta'ava i sakosakona. 'Akonadi 'adi vematavuloga i veveluagai 'ai-'ala'alase kebu yana 'weuga 'waineye, tomotoga matatabuda yada 'eba 'isa bei tosakona vematavuloga i na veluagai.

S4 2 Ion 1:9-10 Lom 6:15S5 1 Kol 10:5-10 Num 14:32-35
S6 Nag 6:1-2S7 Nag 19:1-10,15-16,24-25 2 Fit 2:6-9

8 Tomotoganidi i sakonaga wata bani'odi tove-vekavekali yami 'aila'a nageneye. Yadi 'enoneganega i vevekaliedi bega bunu 'ana nuanua 'waidiega i sakosakona. Yaubada yana veimea kebu nuanuadi i na vematayakeyakedi wata anelose magemagetadi abame, 'waidie i manimanini-'avo'avovo. 9 I lubwainedi kebu i na manini-'avo'avovo. Basenadiotoga Mosese i wafa, Yaubada anelose 'adi to'edakumeta 'ana wagava Maikeli i vetunei 'ana ve'ufa faifaina, Seitani taiadi i ve'ikwayekwayegeni. Siwe Maikeli ma yana ve'ililibu Seitani i vonenimo kebu i da yagaia, i vo, 'Auvea taunina i na talabodemu.” Maikeli toketokena ma yana veimea, siwe Seitani i ve'ililibuyeni, begaidi tovenidi, taunidi tomotoga-'avo'avovo i lubwainedi anelose magemagetadi i da ve'ililibuyedi. 10 Siwe naninidi i bavuyediga, 'waidie i manimanini-'avo'avovo. Taunidi yadi nuanua ava'ai i nuaniga 'aisedi i 'i'idewadi 'aisaya walawala'ai bani'odi, nuanuananidi sakoidi 'waidiega taunidi i 'iveilagidi 'awaie i na wafaotoga.

11 Nuakalikalidi, Keni kumanina taunina taina i luvewafai, yana sauluva i 'ewai. Taunidi i tauyedi sakona 'waineye fai nuanuadi mani, bani'odi basenadiotoga Belami nuanuana mani bega i sakona. Tovenidi Yaubada yana veimea i vevedumwe'ai'aiedi bega vematavuloga i na veluagai bani'odi basenadiotoga Kola i veluagai fai Yaubada yana veimea i uvi'agali.

12 Tutuyanina 'wa 'a'aniluvetubama Iesu 'ana nuave'avina faifaina tovekalinidi 'awasasamie bani'odi yoke, 'awadi bwalabwalaidi kebu yadi bunumayaga i sososoana-'avo'avovo, taunidi 'aisedi faifaidi i nuanua. Inala kabukabu 'ana tutuye waowa i na bweuya ta na sosoaneni siwe kaukau i na beweni 'aivaita kebu ta na veluagai. Tomotoganidi wata bani'odi, kebu tamu sai'afo 'waidiega 'aivaita ta na veluagai. Taunidi bani'odi welavi, vuaga 'ana tutuya 'waineye kebu i da vuavuaga 'wa da vo i da bwavu, we'e tomotoga i na talayavulediga nika i na bwavuotoga. 13 Yadi sauluva sakoidi 'eba bunumayaga tomotoga matadie, bani'odi yagina bwaikidi buobuodi. Wata taunidi bani'odi 'ibadibadi yadi sauluva 'wainega 'wa na vo 'ako, Magemagetadi”, siwe tutuya 'ale'usana wata i na 'a'ava, we'e yadi 'eba mia Yaubada i 'idewa-vagaseni dudubala 'weya'weyauotogina 'waineye, bei i na mia-vagata.

14 Tove-vekavekalinidi faifaidi basenadiotoga Inoki i vona-vagata. Inokinina 'adi ve-7 tubulelelegidi Adama 'wainega, yadi sauluva nagami i 'asetai i vo,

A na vonemi. Toveimea i na mai yana anelose magemagetadi taiadi, 'adi 'aila'a welavi 'adi 'ilukulukuta bani'odi, tomotoga matatabudi i na vonayavuga mataneye. 'Ana tovedumwe'ai'ai sakoidi i na veimeyedi vematavuloga i na veluagai, yadi sauluva sakoidi wata yadi awavesako Yaubada 'waineye 'adi tutula.”

16 Tovenidi tutuya fuedi i vevebonavoluvolu wata 'ai'edi vita i na souyedi 'waidie, faifaidi mali tomotoga i vevevita-maimaigidi. Taunidi i awa'ai'aidi, taunidi yadi nuanua sakoidi i 'i'idewadi wata tomotoga 'waidie i susubia-sebaseba bega naninidi nuanuadi, i na veledi.

S9 Dan 10:13 VeL 34:6 Ve 12:7-8S11 Nag 4:8 1 Ion 3:12 2 Fit 2:15-16 Ve 2:14 Num 31:15-16, 16:1-3,16,19-21,25-33S12 1 Kol 11:20-22 2 Fit 2:13

Matakia wata velu'ase'ase.

17 Ekwavo, 'wa na nuani basenadi 'ada Toveimea Iesu Keliso yana tomata'aulelevo nagami i vonemi i vo, Tutuya 'eba ve'a'ava sai'afoga i na velilivana tomotoga 'ifwaidi i na tovoi i na sisidibidibiemi wata taunidi yadi nuanua sakoidi i na 'i'idewadi.” 19 Vona mogitana tove-vekavekalinidi yadi sauluva bani'odi, yadi ve faifaidi tomotoga i veve'ikwayekwayega bega ve'idi'idi i sousouyedi. 'Anu'anunu 'Atumaina yana nuanua kebu nuanuadi i na vematayakeyakeni, we'e taunidi yadi nuanua bunu 'ana nuanua sakoidi faifaidi, 'aisedi i 'i'idewadi.

20 We'e ekwavo 'omi kebu bani'odi 'wa na munega. 'Akonadi 'wa vetumagana Yaubada yana Vona magemagetana 'waineye, siwe nuanuaku taunimi 'wa na kiavetoketokemi bega yami vetumagananina fa'alina i na 'eno'eno. 'Anu'anunu 'Atumaina yana toketokena 'wainega 'wa na vevelu'ui we'e tutuyanina 'ada Toveimea Iesu Keliso 'wa na lulukamaseniga, taunimi 'wa na 'i'isave'avinimi bega Yaubada yana nuakalikali 'waineye 'wa na miamiani. I na nagoga Iesu yana vila-vaitugana 'waineye ma yana nuakalikali mia 'atumaina wata miamia-vagaina i na velemi.

22 Egavo ve 'ailuga faifaidi i vevenuanaluga 'wa na 'isanuakalikaliedi 'wa na 'ivaisedi. 23 'Ifwaidi i sakona 'wa na kiavenuaviladi 'wa da vo tamu tomogo 'ai-'ala'alase i da be'u 'wa da 'ita'ita'ieni. We'e 'ifwaidi tomotoga i sakona-vebogiga 'wa na 'isanuakalikaliedi 'wa na 'ivaisedi i na nuaviladi Iesu 'waineye, siwe ma yami kololo 'wa na 'isa'isa i na nunago yadi sakona nuami i na 'ewadi nika 'omi wata 'wa na be'u. Mogitana 'wa na 'isanuakalikaliedi siwe yadi sakona 'wa na vedumwe'ai'aiedi.

S17-18 1 Tim 4:1 2 Tim 3:1-2S20-21 Kolos 2:6-7 1 Kol 3:9-11
S22-23 Lom 15:1 1 Kol 15:33

Subia wata velu'ui.

24 Kebu tamu wata aitoi Yaubada bani'odi, 'aiseotogina, i 'ita'ita'ieda sakona 'waidiega Iesu Keliso 'ada Toveimea 'wainega. I lubwaineda matatabuda ta na subisubiai, taunina magemagetana, ma yana toketokena nani matatabuna i veveimeyedi, basenadi, 'asiau wata 'awaie yana toketokenanidi kebu i na 'a'ava, i na 'eno-vagata. Begaidi Yaubada 'ana fata i na 'isave'avinimi bega kebu 'wa na be'ube'u sakona 'waidie, i na nagoga mulieta ma yami sosoana bwaikina i na miemi mataneye, yana 'ai'aiwabu magemagetana 'waineye. Bei ma yami sosoana 'wa na tovotovoi 'atumai'avami, kebu tamu yami sakonaga.

S24-25 2 Fit 3:14 Ibu 13:8 1 Fit 1:5

Vona mogitana, yaku nuanua bani'odi.

Yau Iude.